Son günlər Bərdə Rayon Mərkəzi Xəstəxanasının direktoru Vüsal Məmmədov haqqında sosial şəbəkələrdə müxtəlif paylaşımlar edilir. Hər kəsin fikir bildirmək hüququ var. Ancaq hesab edirəm ki, insanlar haqqında danışarkən onların gördüyü işləri və cəmiyyət qarşısındakı xidmətlərini də unutmamaq lazımdır.
Mən bir bərdəli olaraq 44 günlük Vətən müharibəsi dövründə Vüsal həkimin necə gecə-gündüz çalışdığına şahid olmuşam. Həmin ağır günlərdə xəstəxananın həkimləri və tibb personalı böyük fədakarlıq göstərərək yaralıların və mülki şəxslərin həyatını xilas etmək üçün yorulmadan çalışırdılar. Vüsal Məmmədov da həmin günlərdə öz vəzifəsini vicdanla yerinə yetirən rəhbərlərdən biri idi.
Bərdə raket hücumlarına məruz qalanda şəhərdə yaşanan çətin anları heç kim unutmayıb. Həmin günlərdə xəstəxanaya gətirilən yaralıların qəbulunda, tibbi yardımın təşkilində və həkimlərin koordinasiyasında böyük məsuliyyət tələb olunurdu. Bu yükü daşıyan insanların əməyini görməməzlikdən gəlmək düzgün olmaz.
Tənqid hər zaman olmalıdır və konstruktiv tənqid inkişaf üçün vacibdir. Lakin insanın illərlə gördüyü zəhməti, xüsusilə də müharibə kimi ağır dövrdə göstərdiyi xidmətləri də obyektiv qiymətləndirmək lazımdır. Bir bərdəli kimi düşünürəm ki, haqqı olanın haqqını vermək hər birimizin borcudur.
44 günlük Vətən müharibəsinin ağır günlərində göstərilən fədakarlıqları nə tarix unudacaq, nə də o günlərin canlı şahidləri. Ədalətli olmaq üçün həm çatışmazlıqları, həm də görülən xidmətləri eyni tərəzidə qiymətləndirmək lazımdır.
