"Avropa Parlamentinin son bəyanatı Ermənistanın işğalçı siyasətini bir daha ortaya çıxardı" — Könül İsmayılova

"Avropa Parlamentinin son bəyanatı Azərbaycanın ərazi bütövlüyünü müdafiə etdi və Ermənistanın işğalçı siyasətini bir daha ortaya çıxardı.


Bu fikirləri Demokrat.az-a açıqlamasında Müasir Müsavat Partiyasının sədr müavini Könül İsmayılova deyib. 


K.İsmayılova bildirib ki, Avropa Parlamentinin Ermənistan və Dağlıq Qarabağı birləşdirəcək yeni magistral yol məsələsinə olan etiraz bəyanatı təqdirəlayiqdir:

 

"Avropa Parlamenti bununla Azərbaycanın haqq səsinə çox yüksək səviyyədə dəstəkçi oldu. Həmçinin, ilk dəfədir ki, Avropa Parlamentinin Azərbaycan və Ermənistan üzrə məruzəçiləri, eləcə də Gürcüstan və Ermənistan üzrə Parlament Əməkdaşlıq Komitəsinin həmsədri Ermənistana, onun işğalçılıq siyasətinə ortaq şəkildə açıqa bəyanatla etiraz etdi. Sənəddə qeyd olunur ki, magistral yolun inşası ilə bağlı qərar Azərbaycanın səlahiyyətli orqanlarının razılığı olmadan qəbul edilib. Nəticə etibarilə isə beynəlxalq hüquq normaları açıq şəkildə pozulub".


Xanım siyasətçi, Avropa Şurasından fərqli olaraq Avropa Parlamentinin belə bir bəyanatla çıxış etməsini xüsusi vurğulayıb:


"Baxmayaraq ki, biz Azərbaycan olaraq Avropa Şurasının 20 ilə yaxındır ki, üzvüyük. Lakin bu təşkilatda Azərbaycana qarşı ikili standartlar davam etməkdədir. Bu mənada Avropa Parlamentinin üzvü olmayan Azərbaycan bu qurumdan haqlı dəstəyini görüb. Yəni, Avropa Şurası məlum addımı atmadığı halda Avropa Parlamenti analoji addımı atıb. Burada açıq ifadə olunur ki, magistral yolun tikintisi ilə bağlı Avropa Parlamenti olduqca narahatdır. Bununla yanaşı, Ermənistan tərəfinin bu addımının etimad və sülh mühiti yaratmağa kömək etmədiyi deyilir. ATƏT-in Minsk Qrupu həmsədrlərinin səylərinə və onların 2009-cu ildə təsdiqlənən Əsas baza Prinsiplərinə ziddiyət təşkil edir".


Qeyd edək ki, Avropa Parlamenti iyunun 10-da Brüsseldə Ermənistanın işğalçı siyasətinə qarşı ədalətli və mühüm sənəd qəbul edib. Parlamentin Azərbaycan üzrə məruzəçisi Jelena Zavko, Ermənistan üzrə məruzəçisi Traian Basesku və Azərbaycan, Gürcüstan və Ermənistan üzrə Parlament Əməkdaşlıq Komitəsi Nümayəndəliyinin sədri Mariya Kalyurand, Ermənistanı Azərbaycanın işğal altındakı Dağlıq Qarabağ bölgəsi ilə birləşdirəcək yeni magistral yolun tikintisi ilə bağlı birgə etiraz bəyanatı yayıblar.

BAXAR.AZ


Bizi Telegramda oxuyun


OXŞAR XƏBƏRLƏR