"İşləmədikləri üçün əllərində olan qızılları gətirib bizə satırlar"

"Pandemiya dövründə qızıl satışımız azalsa da, alışımız artıb". 

Bunu Bakıda qızıl məmulatlarının hazırlanması, alışı və satışı ilə məşğul olan zərgər Novruz Əhmədov bildirib.

“Qızılın satışı ilə yanaşı, alışı ilə də məşğul oluruq. Biz qızılı baha ala bilmirik. Çünki sonra onu satmaq mümkün olmur. Bu gün Rusiya qızılını birja qiymətləri ilə 53-54 manata almalıyıq. Amma məcbur olub 50 manata alırıq. Onu isə əridib xammal əldə edirik. Bu zaman müəyyən itkilərimiz də olur. Qeyd edim ki, pandemiya dövründə qızıl satışımız azalsa da, alışımız artıb. Çünki bəzi şəxslər işləmədikləri üçün pula ehtiyacları olur. Odur ki, əllərində olan qızılları gətirib bizə satırlar. Mart ayından etibarən vəziyyət bu cür cərəyan edir. Bəzən olur ki, lombarda qızıl girov qoyan insan borcunu ödəyə bilməyəndə həmin qızılı bizə satır və borcunu ödəyir”, - Novruz Əhmədov deyib.

Novruz Əhmədov əlavə edib ki, pandemiya zərgərlərin fəaliyyətinə xeyli mənfi təsir göstərib:

"Hazırda ölkədə toy və nişan məclisləri keçirilmədiyi üçün işimiz tamamilə dayanıb. Bizim əsas müştərilərimiz toylar nəticəsində olur. Zərgərlərin sexlərinin çoxu işləmir. Çünki sifarişlər dayanıb. Karantindən əvvəl müəyyən qədər müştəri olurdu. Müştərilərin əksəriyyəti yerli müştərilər idi. 2-3 il öncə ara-sıra özbək turistlər gəlirdi. Amma daha onlar da gəlmir. Alıcı qüvvəsi yoxdur. Dükanda gün ərzində bir və ya iki real alıcı olur. Karantindən əvvəlki dövrlə müqayisədə alıcı sayında təqribən 70%-lik azalma var. Müştəri azaldığı üçün icarə haqqını və digər xərcləri qarşılamaq çətin olur. Deyə bilərəm ki, təqribən 2010-cu ildən bizdə qızıl satışı zəifləyib. Keçən il isə bu ilə baxdıqda vəziyyət xeyli qənaətbəxş idi”.

BAXAR.AZ


Bizi Telegramda oxuyun


OXŞAR XƏBƏRLƏR